|
Jå Haschåfzeiten no amåi ei(n)! A Bries hed mi hiaz oundla glust. A diam håts mi schoo(n) gscheit, woa i åft a nid, wå' fi a doifi mi då griidn håd. Hå(n) i do glått mai(n) Spadai min Tawagg anåuscht a da Stååd valoan. Voufeascht iss ma a schoo(n) amoi geschäichn, gråd znaggst a no amåi. Då kunnt i mi åba scho a so ziina! Des Spadai håd an Ruap keascht, main Aanl. Des wånn dea wissad, dea tat si an Gråob umdrah! Mia hand heit a da Fria ausgroast, mi'n Zug auf Soizbuag aussi. Zeascht samma åi zsåmm no eikeascht, glei bein Bånhof as naxtbeste Gåosthaus. Dånn hama schoo(n) eppas guat å(n) zui zua Weissn und hernach eascht weida aufn Rupertikiatåg.
Jå, und koa End ban Hoagaschtn und Brofäizn an Zöit in woa zan säichn. Åis woas i nimma, nua no so fü dass i zun Hoagaschtn schiaga nimma so vü woa. In mai(n) Duusl ho(n) i ma a Schlaffai vagunnt und mi a Bois niedaglegg. I moa das mia då des Spadai agratt ausn Rocksåck aussa gfoin is. Des deaffad i nid dagwååscht håbn. Jå, sou muas's gwain sai(n). Wos bi i k'åd fi'a Kipfi! De Falottn mit deana i an Rupertikiatåg gwain bi', hand a dahi, dia Krippin. Hiaz hed i an Bedl. Mei, waast eppa du so guat, dass d' ma gach häifadsd? Wei mia pressiads. I hon's a wenk gneddig und miassad hoam as Ståigee(n). Da Untaebna Schual mit sein Muichwåogn fåschd glei amoi håamzua. Måggst ma niid gach zrugg schau und mei Spadai hoin, netta k'åd a da enter seit van Båoch. An Waig za main Schlåofplåotz, wo des Spadai no sei miad, kån i da ziezaiwais såogn. Zeascht muast amoi a de ånnare Seit van Båoch kemma. Üwa d'naxtbeste Brugg kimmst schiaga greechnd auf an Heagood zua. Insa oas dad si hiaz bekraizeng, åba då mågsd du doa wia da viikimb. Weida gemma rechts a kloas Stiki åe bis za de Bäitschwestan. Doscht schaust dengg auffi in a so a kloas drångs Gassai. Åwa nid das d'ma glei kråd auf duachi måschiast. No schiaga herunt muasd ma amoi dengg bei anan kloan Lechi eii und dåo woost ent aussa kimmst, kråd auf duach bis d' za da naxtbestn Stråoss kimmst. Hiaz hoassts aufpassn. Nit dass d' ma zwaid de Stråos dengg awaus geest. Gaggst amoi geet a kloans Stiagai s'Bergl auffi. Doscht mågst ma bitt gåo schee auffihadschn, de naxte Stiagn gest ma a glei no auffi, bis d' wida auf ana kloanan Stråos biist. Båidsd de Stråos weida åe roasn dadst, kunnst da a Hoiwe Bia gnemign oda glei a Måss, tummen brauchst di jå nit. Då håst scho amoi a wenkei a Gäid, wei des Bia geet auf jedn Fåi auf mi. Båid di hiaz no nit nåch an Bia blång, mågst a bain zrugg gee zuakean, gåuonz wia da viikimb. Jå hiaz hed i di båid an kroas gschickt voa lauta Biaglusta. No amoi: Du bist kråd übas zwoate Stiagai auffa kemma und schaust de Stråuss åe. Då sigst no voa da naxtn Raid bei oana Stråussnlatern dengg a Wegei ei(n) gee, zeascht geets no a boa stoanane Tråppn auffi, i moa viire oda fünfe miadns gwen sei(n). Nochad geets ebn dahii. Das d'ma håit nit dakimst, wei då dans a diam schiassn, glai nem an Wegai. Glai nåchand geets iwa an ettla mea Tråppn aufi, duach an Duachgång duachi und aussi auf a Wisn. Do gest ma kråd weida, nit iwan Roa(n) auffi, åiwai ebn dahi, schee owaschiich vo de Gwänt blaim und åiwai schee(n) aufn Wäig blaim und åiwai ehenta rechts håidn muast di då. Båids Weda schee(n) wa, miadst va då aus schiaga ei(n) sechn a de Berg. Gee(n) tuast scho a Bois bis s'a(n)gaggst an Wåid inn rechts åichi geet. Jå, de Tråppn då mågst glai åizischn.
Heen tuast eh guad? Unt a da Stråoss muast d'Loosa guat aufspeen, dass d'as Wåssa daheescht. Hiaz muast eh kråd no den Båuch stromaufweaschts gee(n), scho(n) a Sticki bis za dera Stö, wo da Båuch si zwiitoa(n)en tuad. Boid's di wunnascht wo a is, da Båuch, a diam vadruckd a si unt ei(n), do muastn håid an weng suachn. Wenn da de Umazdumsuacharei scho z'letz weascht, gehst ma doscht hi(n) zrugg, wo sd' die Tråppn van Bergei åcha kemma bist, dåo wo da Båuch an Berg ei(n) vaschwindt. Doscht schnappst då an Kompass und geest genau dreihunaschtzwårafuffzg Klåfter agratt a de Richtung, dånn miads'd a hi(n)kema:
|
|
Då muass gwenn sai, moa i. Glai dåu oda anåuscht umantum miads s'Spadai heagee, båids ma koana davoo håd. Eppa håd si's a in oana Klåoss vaschloffn. I moa då mågst direkt a weng suachn und umanånda stiiln bis des Spadai amoi heageet. Wenns koana gstassd håd miad's scho zan findn sei. Båid s a recht a Feilgerei is oda båids da z'håschd weascht, iss a koa Schånd nit. Nopfetsd håid a wenchai, s' wa eh a fei(n)s Platzei dafia. Bein Suachn soid di hoit kåana segn, siist hoit a di eppa no fia an Låppn dea ummasiinstig a da Lettn umanånda stiilt. Då mågst scho aufpassn, åi Gebuht kimmt da då eppa voabei.
Ah jå, då håst no mei Ånschriift, dass d' ma's Spadai schickn mågst båidsd koa dawai håust zan bringa: I bi(n) da Eda Mascht, dahoam bii bein Süchia Bauan z'Moashofn. An Liawan was ma åwa scho wennsd ma's Spadai gaengst amoi voabeibrachst. Vazoist ma nåcha bitt gao schee wia's da gånga is und ob des Spadai doscht anouscht hergånga is. An liawestn was ma du vazoist ma's a insara Språuch sii(n)st dua i ma gåa so schwa bein vastee(n). Iwa a båa Buiddai tat i mi a narisch gfrei'. Mia zwee(n) gen noan midanond zan Bladlessn zan Gealinga Wiascht und an båsn Nuul hintnochi vagunn ma ins a, oda eppa nit?
Jå åft nåchan, vagöids Good und Dånk da recht sakkrisch. Pfiat di dawai.
|