Frå Fanafjellet går det ein fin sti i delvis ope landskap via Jordavatn og vidare over heiane i sørleg retning. Stien deler seg eit stykke vest for Svartavatnet. Medan den eine stien går til Svartavatnet, går den andre stien over heiane ned til Nordvik. Til eller frå Svartavatnet kan ein sjølvsagt følgja skogsbilvegen som startar ved Pøylo i Os.
Stien går i eit noko kupert terreng, delvis gjennom skog, delvis gjennom meir ope landskap. Fleire stader undervegs har ein eit fint utsyn utover mot Austevoll og havet. Føremålet med cachen er å få fleire til å oppdaga denne idylliske turen langt sør i Fana. Utleggjar har lagt ut mange stikoordinatar med tanke på at cachen skal kunna takast frå ulike kantar. Og kanskje finn nokon ut at dei vil gå heilt over.
Dersom nokon går til eller frå Nordvik, vil utleggjar tilrå at turen vert lagt via Storakvitefjellet (GC3HKHR) for ytterlegare fint utsyn mot Lysefjorden. Sjå i så fall waypoints som er lagt ut for den cachen.
Over: Utsyn mot havet i vest frå om lag ved nullpunkt. Under: Undervegs på stien.
