Friso Lübben koopt in - oder doch nich? Mystery Cache
Pucki*: Wirt wurde entfernt. Hier ist jetzt Schluss.
Friso Lübben koopt in - oder doch nich?
Please note Use of geocaching.com services is subject to the terms and conditions
in our disclaimer.
Een lüttje plattdüütsche Rätsel, för dat ji n beeten op "Zeitreise" gahn mööt. Ji bruukt Saken ut de Vergangenheit un ut de Gegenwart. För Lüü ut de Wersermarsch is dat licht, för de annern woll nich... dat Final sülvst is licht to erreichen. Ji könnt nahbi parken. De Cache is nich an de gelisteten Koordinaten. Bitte weest een beeten vörsichtig, wenn ji de Döös ut den Wirt friemelt.
Friso Lübben koopt in - oder doch nich?
He weer an sik jo`n geduldigen Minschen, man so bi lüttjen wurr em dat doch to dull. Eerst güstern weern dar woller`n paar junge Deerns vorbikaamen an Guffeln un se deen mit den Finger up em wiesen - of dat wat he dar anhar, woll een Bademantel weer? Un wo dat dar unner woll utsehg?
Nee, dat mööt he sik nich been laaten, tomal nich von so junge Dingers. Un langwielig weer em alltomal. Siet hunnert Johr stunn` he dar nu al inne Gegend rum, un bloot eenmal in Johr schmeeten n` poor oole Keerls n Bulten Grööntüch bi em dàal. Nee, Friso wull nu ok mal kieken, wo dat in´n eenuntwintigsten Johrhunnert so utsehg. He harr siet veerhunnert Johr kien Äkschen mehr hatt, un so bi lüttjen wurr dat mal Tied. Un wiel Saterdag weer, un he nix wieter vörhar, besloot he na Ollnborg to fohren un sik nee Kledaasch to koopen.
Do keem ja just de Bus! Nu man gau los!
Dat duer nich lang, dor wurr em al klöterig tomoot. Dor weern se man just bi´n Ponyhoff. He weer dar nich an wäänt, so gau unnerwegs to sien - de Gegend floog man so an em vorbi.
Man kniepen is nich. He bleef stuur sitten, bet se inne lüttje Stadt keemen. De geev dat domals noch gar nich, as he jung weer, un Friso weer bannig neeschierig. Man he fööhl ok dat Grummeln in sien Innereen. Een Schiethuus kunn he nu woll bruuken... Just bi´n Bahnhof weer ok een, un wo hochmodern sehg dat ut! Man funktioneeren de dat nich. Friso weer baff. So sehg also de Fortschritt ut! Dar weer he an leevsten woller in sien eegen Tied torüchkehrt, aver dat gung ja nu mal nich. Also sloog he sik mal fix inne Büsche, so as he dat fröher ok daan harr. Un wieder gung´t.
So bi lüttjen keem sik Friso al as the groote Mann von Welt vör, as he so up den Bus rieden de. Man Fleutjepiepen. Just at he in de groote Stadt Ollnborg utsteeg, keem em al een vun sien fröhere Widersachers inne Mööt.
"Wat wullt du denn hier, du oole Pannkoken! Seh to, dat du Land gewinnst" bölk de em an.
Friso verjaag sik eerst, dacht denn aver daran, wo faken he de Ollnborgers wat up de Nääs geven harr (blot dat eene Mal even nich) un he anter ganz sinnig: "Moin ok! Ik wull mi bloot mal joon neen Chef ankieken. As ik höör, versteiht de woll wat von Päär, un een moien Appelschimmel schall he hebben. Heff ik in Roonkarken woll al mal seen, wenn de Graf eenmol in´n Johr to Besöök keem. Kannst mi den Weg woll wiesen?"
Dar weer de Ollnborger bannig stolt un föhr Friso to dat oole Huus mit dat Gemälde van Graf Anton Günther, wo he up sien Hingst rieden dä. Man, sä he to Friso, eegentlich weer A. G. gar nich mehr Chef. De leeg nämlich al lang unnern Rasen.
Maakt ok nix, seggt Friso, in mien Oller kann man ok woll mal döörn`anner kaamen mit al de Johrhunnerte. N` bannig feinen Hingst harr he jedenfalls hat, sä he, un up goode Päär keem dat altied an. Dat weer hüüt nich anners as fröher.
In dat Lokal bi dat Gemälde slaat sik de beiden denn erstmal den Panz vull un suupt ok düchtig, De Ollnborger betahlde un Friso höögte sik stillkens. Se fiern Versöhnung - so na fiefhunnert Johr kunn man dat woll mal maaken. Friso laad den Ollnborger denn ok to´n Roonkarker Mart in. Pah, seggt de Ollnborger, use Mart is veel grööter un moier. Wenn du di dar man nich versühst, seggt Friso.
Denn weer ok al woller Tied na Huus. Mit den letzten Bus keem he woller an, klatter stiekum up sien Sockel, as wenn nix ween weer. Wenn he nich daalfullen is in sien gleunigen Kopp, denn steiht he dar vandag noch. Ji könnt ja mal nakieken.
Man - nee Klamotten hett he jümmers noch nich. He harr jo gar kien Geld mitnahmen un kunn von Glück seggen, dat de Busfahrer em nich wegen Swartfohreree rutsmeeten harr.
Tja, so ganz eenfach is dat nich för so´n olen Freesen in´t eenuntwintigste Johrhunnert. Aver Spaas hett em dat maakt, un dat is de Hauptsaak.
Ik hoop, dat ji ok Spaas hebbt mit disse lüttje Rätsel. Ji mööt n beeten twüschen de Johrhunnerte hin- un herjumpen, man dat kriggt ji woll hen. Un vergeet nich, to´n Roonkarker Mart to kamen! In düsse Johr is de von 19.-23. September. Un nu geiht los:
A. Wo veele Minuten sünd dat von Friso´s Haltestää bet to´n Ponyhoff?
B. Wo heet de lüttje Stadt?
C. Disse eene Mal, wo de Freesen nich gegen de Ollnborger wunnen hebbt, wann weer dat genau? (mit Datum)
D. Wo heet dat Peerd vun Graf Anton Günther?
E. Wo heet dat Lokal, wo dat Gemälde anne Huuswand is?
F. Um wecke Tied steeg Friso ut den Bus, as he ut Ollnborg torüchkeem?
Dat Final is bi N 53° 23.ABC E 008° 27.DEF
>br>
A = Tahl mol twee
B = Antahl Bookstaben minus dree
C = tellt mol de Ziffern tosamen un treckt denn acht af
D = iterierte Quersumm
E = Antahl Bookstaben (veer Wöör) minus 22
F = Summ minus 11
A = 1, B = 2 usw. / ü = ue
UPDATE 03.09.2014: Friso is umtrokken un wat lütter worn. Tellt to N 82 darto un to E 54, denn schallt ji em woll finnen.
Mien Dank geiht an de beiden Kläuse, de mi hulpen hebbt:
- MTKEus ut Duisburg för den Betatest
- Klaus Wessels, Schrieverkring-Baas in´n Rüstringer Heimatbund, de dat Plattdüütsch in Schriftform brocht hett.
Additional Hints
(Decrypt)
440
Treasures
You'll collect a digital Treasure from one of these collections when you find and log this geocache:
Loading Treasures