Stranda i Onglavikjo / Onglavik beach Traditional Cache

Moster er ei av dei tusen øyar som utgjer kommunen vår – Bømlo. Med sjø på alle sider er det ikkje vanskeleg å finne seg ei lun vik der ein kan bade og kose seg. Me har fleire kjente badestrender, men også nokre som ikkje er like kjente. I denne serien vil me vise fram nokre av strendene på Moster. Ta med deg badeklær, bøtte til krabbefiske, litt niste og ha ein strålande dag på stranda. 

Dette er den første i ein serie strandcacher på Moster

Stranda i Onglavikjo

Denne stranda oppdaga eg ikkje før eg var vaksen. Så lenge vinden ikkje kjem frå nordvest, er dette ei lun og fin strand. Det er steinstrand, men det lokale vel'et har fyllt på med skjelsand ved fleire høve. Her er det ein fin bakke for ungane å springe på, og om sommaren vert det sett opp volleyballnett. Det er ein del mink i området, og det hender stadig at badegjestene får sjå mink springe forbi.

Kvart år vert det feira st.Hans på denne stranda. Då er det stort bål nede ved vatnet, utlodning, leikar for ungane og mykje morro!

Vær snill å legge boksen tilbake slik den ligg, då dette er ein populær plass både for ungar og voksne. Ein alt for synleg boks vil nok lett forsvinne.