No har eg balt med geocaching i eit år, og har hatt det mykje kjekt med det. Eg er nok ikkje fullt så loco som nokre av dei andre eg har møtt i samband med denne hobbyen, men kanskje mest loco av oss som held til på Sommarøyo.
Eventet finn stad der Timian, Irene og eg fann den første boksen vår for nøyaktig eit år sidan. Ikkje lenge etter la eg ut min tredje cache berre eit par hundre meter inn i skogen. Etter kvart er dette eitt av dei områda på Stord der geoachane ligg tettast.
Sidan den gongen har eg funne boksar jamnt og trutt utover våren, mindre etter sommaren. Mange i skog og mark, og dei som står høgast i kurs hos meg er vel kanskje dei som ligg på ein fjelltopp. Eg har funne dei fleste i Stord kommune, ein god del på Karmøy, nokre i Polen, Noregs eldste i Bergen, teke ferja til Halsnøy berre for å vera FTF, lagt ut boks på det høgaste fjellet i Stord og Karmøy kommune og hatt mange minnerike turar, både åleine og saman med familien min.
Dette er ein badeplass i ei fin vik. Det kan vera kaldt når det bles, så kle deg godt. Har tenkt å ta med meg noko grillkol, så ta med deg ein pakke pølser og kom på event. Viss nokon tek med seg ein vedkubbe eller to, kan me laga bål òg.