Èl clokî
Seûr, les Aclots d’èm course, pus jamés n’èrvîront
Èl clokî d’sainte Djèdru avè ’s bia cariyon.
Èl feú nos l’a rosti, tout ène après-din.ner.
Djè m’d’in souvins si bin, au mitan du mwès d’mé.
Èl solèy´ tapoût foûrt d’abzass dsu les ardwèsses,
No vî Djan stoût binéche, binéche dè toudi yèsse
Èl pus vî des Aclots yè ’l mésse dè toutes les clokes
Spârdûwes dins les poutrèles, pindant bèrlike-bèrloke.
Yè pou yèsse bin à l’eûre, no Djan s’aprèstoût d´djà
À buchî su les clokes, in coup avè ’s mârtia.
Mins vlà qu’su l’intrèfète au mitan d’in nuwâdje,
I vwèt vnu dèssu ’l vile in min.nant grand ramâdje
Ène voléye dè pidjons qu’i n’èrcounichoût nin
Pou l´z avwêr vu nichî dins les traus du clokî.
I n’ pinsoût nin ’l poûve ome què ces brouyants mouchons
Arivine dèsmoli les pus bias d’nos corons.
In vré feú d’artifice dèstrûjoût tout ’l martchî,
À trinte pas dèl grand-place, on n’savoût aprochî,
Èy’ au mitan d’tout ça, no clokî s’dèsvinkyôut
Conte l’afeuwur´d’infièr qui tout doûçmint l’rondjoût.
Dins in dérnin èfoûrt, il a tcheû sul pavéye
Èy’au dzeûr, sacans djîzes, qui moustront les nuwéyes,
Chènont dire au Sègneûr qu’est là dins ’s paradis :
« Wétîz- m’ pau là, boun Dieú, çu qu’les Boches ont fét d’mi !»
Les mézos du martchî n’sont pus qu’in moncha d’pières
Èl chasse dè sainte Djèdru èsst´ èvoye in fumière,
Mins ’l pus vî des Aclots n’s’a nin lèyî abate,
Il est dmoré stampé, tout fièr dsu ses deûs pates,
Quasimint au stwèlî, grimpyî dèssu ’s tourèle,
Sins lachî d’ène munute, i vèye su ’s vî Nivèle
Yè chène dire aus Aclots qui padzou l’èrwétont :
« Èy’adon là ’m colau, c’est pou quand ’m cariyon ?»
Willy Chaufoureau, 1945.
AB/CD/EFGH
