Èl Dodin.ne
Pou les Aclots, ’l Dodin.ne, c’èsst´ in monde dè biaté
Yusk’is s’invont tèrtou, pa les bias djoûs d’l’èsté
Pourmèner à leû n-éche, au trèviè des pièsintes
Pa t’avau les lilas yè les blanchès jacintes.
Dèspû ’l pikète du djoû, on intind les mouchons,
Les mazindjes, les osse-cu, les sizès, les pinchons,
Gazouyî yè tchipter in rdjiblant dins les couches
Pindint qu’in riftant l’eûwe ène aronde cache à mouches.
Mârtin, tout in nadjant, èrnètîye ses pènas,
Ène binde dè pèchons roudjes file intrè les rojas
Èy’asto dèl coulète, in djoûne gamin assaye
D’fé sclider su l’ètang in tout tène fèstu d’paye.
Qu’i fasse bia, qu’i fasse léd, les stalas s’èrtrouvont
Dsu les bancs d’ène gloriète pou djouwer in couyon.
Des rintiés dins in cwin rabrauznont politike
Tèrchèdon qu’in grand-pé, sins lachî, mache ès chike.
Ène vîye djoûne fîye, pal lache, pourmène in bastârdé.
Pus lon, padière in ârbe, yè bin raclipotés,
Des amoureûs s’bètchont in tout s’tènant pal taye
Sins s’èrtoûrner d’Francwès qui raguide pau trau d’l’aye.
C’est ça ’l parc dèl Dodin.ne, no ptit monde dè biaté
Yuskè nos vnons nos rachîr aus pus bias djoûs d’l’èsté.
Les vrés Aclots l’in.mont, come on pût in.mer ’s mére,
Come in djoûnia d’séze ans pût yèsse fou d’ès coumére,
Yè dj’souwéte quand dj’morrai, si ’l boun Dieú vût bin d’mi,
Qu’il eûche ètou ’ne Dodin.ne au fond d’ès paradis.
Willy Chaufoureau, 1945.
A = où ils =
B = et =
C = cependant =
D = observe =
E = déversoir =
