Sodala, ich hoff mei Fränkisch is nuch ned ganz eigrosd nohch di villn Johr im Ausland. Wenn doch, schreibds mer und ich korregier des dann gleich im Dexd.
Vor zwa Johr ham mir des Dosenfischen o'fangd. Unser klaaner wor grod neddamolnuch a halbs Johr old und wie uns die dächlicha Sbaziergäng midd dem Kinnerwohng a weng longweilich worrn sen, hod mei Frah im Inderned des neia Hobby g'funna. Dolla Sach!!!
In der Zwischazeid worn mir scho rechd vill underwegs und hom überoll a bor Dosen gsuchd und dabei fei a a bor rechd nedda Laid kennaglernd. Edzerdla solls widdermol auf B'such ins Fränkische geh und do hom mir dochd, lohd mer hald mol zu an Ihvend ei, vielleichd kummer ja einicha von die Owhner, vo dehna mir scho Dosen gfunner hom oder die sunsd nuch su in der Gehngd underwechs sin. Eigloden san alle, Eiheimische und Fremda gleichermohsen!
Wer Lusd auf an gmüdlichn Ombd in Wunsehs midd a weng Blaudern, an Bier und an knusbrichn Göggala hod (ja, freilich, gibds a was annersch zu essn und zu dringe, die Kaddn hod a rechd grussa Auswohl), meld sich direggd midd suan "Will addend"-Eidroch oh. Blädz gibbds örschdamol für 20 bis 25 Laid. Wer zuerschd schreibd, hod sein Blodz sicher, danoch muss ma sähng wies weidergihd.
Wann: Dunnersdoch na' neindn Februar umma siemer ombds; bei guda Underhaldung blaim mir sicher bis um de neina rum hoggn (Do. 09.02.2017, 19:00-21:00 Uhr)
Wuh: In da Krona in Wunsehs (Gasthof zur Krone, Wonsees)
Wos: Zamsiddzen, essn, dringe und a weng redn hald
Warum: Weil ma' edz widder amol auf B'such in der oldn Heimad sen, a bohr Dosensucher-Laid bersehnlich kennerlerner wolln und a Lusd auf a knusbrichs Göggala hom
Wosd' middbringer sollsd: An Durschd und an Abbedid, G'schichdn übers Dosen findn und deina draggables (TBs und Coins) haasd des glaab ich auf neudeudsch.