Up Wittow, nich wiet von’t hoge Öwer, het ees ’ne Nuersfruu wahnt, to de kem eenes Dags ’ne Seejungfer, de för gewöhnlich in’n Water lewt un bloß denn un wenn an’n Strann kümmt, süht na baben to as’n Minsch un nah unn’ to as’n Fisch ut un is ganz nakt. De Buersfruu was grad bi’t Uptrecken von’n Flaß, as de Seejungfer bi ehr intred. De äwer kennt so wat nich un frog, as so ’ne niegligen Fruugenslüd dat inne Mod hebben, wat dat wir. De Buersfruu säd, dat wir Flaß, un davon würden Hemden makt.
De Seejungfer: Is et denn ’n Hemd, wenn de Flaß uptreckt is?
De Buersfruu: Ne, denn möt he irst röst’t warden.
De Seejungfer: Un is het denn ’n Hemd?
De Buersfruu: Ne, denn ward he irst drögt.
De Seejungfer: Un is het denn ’n Hemd?
De Buersfruu: Ne, denn kümmt he in’n Backaben un ward beizt.
De Seejungfer: Un denn ’n Hemd?
De Buersfruu: Ne, denn ward he brakt.
De Seejungfer: Un denn ’n Hemd?
De Buersfruu: Ne, denn ward he schwungen.
De Seejungfer: Un denn ’n Hemd?
De Buersfruu: Ne, denn ward he häkelt.
De Seejungfer: Un denn ’n Hemd?
De Buersfruu: Ne, denn ward he spunn’.
De Seejungfer: Un denn ’n Hemd?
De Buersfruu: Ne, denn ward he wunn’.
De Seejungfer: Un denn ’n Hemd?
De Buersfruu: Ne, denn ward he wewt.
De Seejungfer: Un denn ’n Hemd?
De Buersfruu: Ne, denn ward he bleekt.
De Seejungfer: Un denn ’n Hemd?
De Buersfruu: Ne, denn ward he intweischneeden.
De Seejungfer: Un denn ’n Hemd?
De Buersfruu: Ne, denn ward he tosamneigt.
De Seejungfer: Un denn ’n Hemd?
De Buersfruu: Jo, denn is dat’n Hemd.
De Seejungfer: Na, denn will ick doch lewer so nakt blieben as ick bün un nie un nimmer ’n Hemd drägen!Dornah ging de Seejungfer weere to Water un was verschwunn’!
Final:
Zähle alle Tätigkeiten (= T) der Bauersfrau und rechne:
N + ( T x 28 : T - ( 4 x 7 ) )
O - ( ( ( 36 x T : 4 - 9 ) + ( 328 x T ) ) x 0 )
