Os carpinteiros cos pés mollados - 14
O veleiro Nieves foi construído polo mestre carpinteiro de ribeira Manuel Domínguez Lestón nos estaleiros de Broña. Botouse ao mar no ano 1919 con vinte e sete con cero nove metros e cento vinte e oito con oitenta toneladas netas.
Ata o ano 1941 dedicouse ao transporte de arxila de Dena e da madeira de Outes aos portos de Levante e o Cantábrico, retornando a Ría de Noia con carbón asturiano e sal de Torrevieja, fundamentalmente.
En 1986 foi adquirido por Peter Grundahl quen, logo de cambiarlle o nome polo de Nostromo, dedicouno a facer cruceiros nas Illas Canarias. Con este fin instálanselle dúas casetas para facer máis cómoda a viaxe dos pasaxeiros, que podían ascender a uns cento cincuenta.
Cando xa se pensaba no seu desmantelamento, o historiador Björn Arp xunto co empresario Alfredo Fernández atopáronse co Nostromo, e decidiron rescatalo para traelo ás súas aguas de orixe.
Como se dun emigrante se tratase, o Nostromo regresa a Galicia onde recupera a súa silueta orixinal e o seu verdadeiro nome: Nieves.
Hoxe, o Nieves é un buque referente na recuperación do patrimonio marítimo do noso País. O mítico Nieves, feito en Outes, por suposto.
A carpinteria de ribeira e os estaleiros no Concello de Outes, Xoán F. García Suárez. Ed. Toxosoutos, 2008
Mar de Outes. Berce dos carpinteiros de ribeira galegos, Santiago Llovo Taboada. Ed. Meubook, 2016