O petróglifo máis próximo a Bertamiráns e o único que está na zona baixa. Vense varios gravados, o máis chamativo unha cruz cunha cunca ao seu lado. Son varias as rochas que presentan gravados, círculos concéntricos, cuncas. Foron descubertos a causa das obras da autovía. Consérvase o conxunto debaixo dunha ponte pola que transcorre esta. En total, pódense observar uns 5 gravados, todos moi desgastados.
O acceso aos petróglifos é seguro en coche a través dun desvío da estrada principal Santiago - Bertamiráns pola rúa da Rosaleda. Seguir por esta rúa ata atopar a ponte pola que pasa a autovía.
TOPONIMIA
Aínda que nos carteis oficiais na zona denomínanse petróglifos do Vilar tendo en conta o nome do lugar no que se atopan. Pola contra, na publicación "Os petróglifos de Ames: aprender da contorna ensinando a amala" coordinado por Alicia Eva Garea (http://www.edu.xunta.gal/centros/iesames/system/files/OS+PETROGLIFOS+DE+AMES+memoria.pdf) fálase de que, aínda que nos documentos oficiais consta o topónimo "o Vilar", nas webs parece ser máis empregado o topónimo "os Batáns" que pode referirse á proximidade dos muíños e o rego dos pasos.
GEOCACHE
A idea de colocar este caché neste lugar é iniciar unha serie de cachés nos que se trace unha ruta por estes elementos patrimoniais tan descoñecidos incluso pola poboación amesá.
O caché encóntrase oculto nunha zona próxima ao petróglifo pero que non interfire no conxunto patrimonial. As coordenadas apuntan a unha árbore próxima ao caché desde a que non é difícil atopalo, seguindo a pista adicional.
Esperamos poder subir máis cachés desta serie proximamente.