As primeiras referencias ao priorado datan do século XII. Documentos composteláns refiren a esa época a existencia dun pequeno mosteiro, aínda que algúns autores consideran que a súa orixe pode ser anterior. Na historia compostelá relátase como o abade D. Arias, cede a propiedade ao Rei Alfonso VI, e como máis tarde, no ano 1107, a súa filla Dona Urraca, e o seu home, D. Raimundo de Borgoña, devolven a cesión ao Arcebispado Compostelá. A partir do século XV pasou a ser patrimonio da Colexiata de Santa Maria de Sar, como parroquia rural.
Tratábase dun mosteiro beneditino e considérase que foi unha granxa que abastecía a San Martiño Pinario, ademais de servir a casa correccional para os monxes composteláns. Desaparecido o Priorado, foi durante moitos anos a Casa Reitoral da Parroquia de San Mamede.
Xunto ao edificio do Priorado atópase a igrexa. Desde os tempos medievais nos que se constituíu a parroquia existiu un templo neste lugar. A igrexa que chegou ata os nosos días debe moito ás obras realizadas no século XVIII. Algunhas pedras do edificio anterior están hoxe incorporadas ao muro este, onde se sitúa a sancristía do novo templo. Cara a 1740 o corpo novo e a cuberta de madeira estaban finalizados, pero ata finais do século non sería reparada a capela maior, capela que foi cuberta cunha bóveda nova. A fachada podemos datala entre 1786 e 1818. Está concibida seguindo cánones clásicos, a pesar de que conserva pináculos de gusto barroco para proxectar verticalmente o edificio. O campanario é un engadido posterior, seguramente ben entrado o século XIX. O interior é sinxelo, a capela maior conserva a bóveda de canón antigo e está adornada cun retablo barroco.
Outros datos:
A casa reitoral é unha gran construción cúbica que preside o atrio. Durante algún tempo acolleu, na planta baixa, o teleclub veciñal. Na parcela da beira podemos ver un hórreo de grandes dimensións, que, segundo parece, pertenceu á casa grande de Frenza. O cruceiro é unha peza sinxela e austera.
Gracias á inestimable colaboración no maquetado da páxina a OGolpe
Podes validar a solución con certitude.