UTKLIPP FRA LOKALAVISA, MØRE NYTT.
I august 2007 stod parken ferdig, og vart offisielt opna av tidlegare fylkesmann Ottar Befring. Initiativtakar til parken var Gunvor Kvalsvik Indreeide, og ho sat også som leiar i styret i den første tida.
– Vi i styret for Fiskarkona har hatt ansvaret for vedlikehald og drift av parken. For å få parken realisert har vi jobba for å få inn pengar både frå private og bedrifter. Vi har også arrangert konsertar i kyrkja og hatt fiskarkone-fest i Barstadvika. Vi må også sende ein stor takk til alle bidrag som kome inn, både stort og smått. Utan desse bidraga så hadde ikkje parken kome opp. No er det kome på plass eit nytt bygdeutval på Vartdal, og då meinte vi at det passa å overdrage parken til dei, seier Pauline Vartdal Vinjevoll.
Vi snakka også med kommunen, men dei var dessverre ikkje så interesserte, seier Rolf Gjøsdal.
– Eit lyft for bygda
Det er Tore Bjørn Skjølsvik som har laga statuen av fiskarkona, og parken vert flittig nytta.
– Det er mange som er innom parken og sit der til ettertanke. Fleire legg også turen innom når dei er ute å spaserer, og parken har vorte eit lyft for bygda, seier Vartdal Vinjevoll.
Til feiringa kjem forteljar Guri Aasen saman med felespelar Andrine Longva Kopperstad. Gjennom ord og tonar vil dei framføre forteljeframsyninga «Fiskarkona og døtrene hennar – eit hundreårig kvinneminnealbum». Denne framsyninga har vakse fram frå skiftelege lokalhistoriske kjelder og gjennom samtalar med 30 kvinner og menn i alderen 48–104 år. Ein del av scenografien er fotografi av kvinner i fisketilverkinga.