500.000er Event Event Cache

Kon'nichiwa!

I bins - da Mazda 6 Kombi vom Bruno, heit bin i amol im Mittelpunkt und des is guat so! Mir Cachemobile kriagn viel zu wenig Aufmerksamkeit, ohne uns warat euer Fundzahl nämlich a ganz andere - so schauts aus! Und wenn i scho amol zu Wort kumm nutz i des glei schamlos aus und dazöhl eich a bissl wos vo mir wenns recht is. Jeder, der mein Besitzer kennt was, dass des evtl. a bissl länger dauern kennt - der redet gern gleich vül wie i bzw. umgekehrt  I hoff, ihr hobts a bissl Zeit, i hob nämlich einiges zum dazöhln...

Wie eich evtl. scho aufgfolln is hob i über die Johre a den Dialiekt von mein Besitzer augnommen, folls do Verständigungsprobleme gibt gern frogn, der kau Hochdeutsch a

Warum treff ma uns heit? Wal i 500.000 km am Buckel hob, des is amol zum Mond und fost holwat a wieder retour oder para 12 mol um den Äquator, net so schlecht für guate 11 Johr oder? Am 05.03.2012 hot er mi angmeldet bzw. wemma genau san sei Firma. Von Anfang an hob i immer in ana Garage stehn dirfn, super Sache! Unter Tags meistens in Stainz auf irgendan Parkplatz, wal durt am Hauptplatz wor sei Firma. Also samma jede Wochn para 5 oder 6 mol Schwanberg - Stainz und retour gfohrn. Regelmäßig nach Graz seine Freind besuchen wor a immer am Plan und wie oft dass ma Wien zur Stadthalle oder so gfohrn san kau i a net mehr genau sogn, oft auf jeden Foll. I hob also a schon die ersten Johr a bissl a Gegend gsegn. Apropos Jahre - i wor eigentlich nur für 3 Johr geplant wie meine Vorgänger wie er amol dazöhlt hot. Die zwa Autos vor mir hot er nämlich immer mit ca. 120.000 km und noch 3 Johr wieder eitauscht und des wor a bei mir so vorgesehen. Owa genau 2015 wie i eigentlich soweit wor hot da Bruno sein Handyhop in Stainz aufgeben und si entschieden, dass er mi bis auf weiters amol gholtn wird und hot des Leasing von 3 auf 5 Johr verlängert, nächste guate Idee!

Jo, glei drauf hot er mit dem komischen Hobby do augfaungen, im Sommer 2015. Do wor noch net ansatzweise abzusehen wos des für mi die nächsten Jahre und bis heit hasn wird, do is erst richtig los gangen... Leitln, do worn die 3 Johr vorher a Lerscherlschas dagegen wos do seitdem olls passiert is owa schen da Reih noch...

Okay, wo worma, 2015, genau... Do hot da Hr. Chef sei Leben nämlich dermaßen umkrempelt, i wor do sehr skeptisch muass i sogn. I hob jo a bissl von sein Plan mitkriag und des hot so gor net zu eam passt, so 90 Grad obiagn und wos wos laft komplett hinter si lossn, dawal mog der Veränderungen eigentlich überhaupt net owa aus heutiger Sicht wor des absolut richtig. Pah, i wullt eigentlich von mir dazöhln owa unsere zwa Gschichtn san scho sehr miteinander verwoben, verzeihts mir wenn i ab und zu a bissl abschweif...

I hob glei gmerkt, dass eam die Dosensuacherei taugt - und wenn eam wos taugt dann mocht er kane holbn Sochn, mocht er sowieso selten. Dann hot er mi im Frühling 2016 amol zwaraholb Wochn allan lossn, i hob scho gedocht des wors jetzt und er geht fremd, owa er wor "nur" 19 Tog auf Malta an guatn Freund besuchen, den Ghandi - der kommt später in unserer Gschicht noch öfter vor wahrscheinlich. Und wie er durt fremdgangen is: Do dazählt er ganz stolz nochdem er wieder do wor, dass er fost 2.000 km auf Malta mit an andern Auto unterwegs wor. Wie i dann owa a Foto von der Kistn gsegn hob hot si des mit meiner Eifersucht schnöll glegt: A 107er Peugeot, a Offnschaukel mit Automatik, der paßt bei mir fost in Kofferraum eini, kein Grund zur Eifersucht

Apropos Eifersucht: Immer wieder amol im Summer hot er meine Nummertafeln owa gnommen und irgendwann wieder auffi gmocht, des hob i lang net überzuckert wos do los is. Irgendwann hot er mit dann für a Starthilfe braucht und wos hob i do gsegn? Der Hund hot noch mehr Autos - AN GANZEN HAREM !!!!! Pah, do wor i dann sehr wohl eifersüchtig - und wie!!! Mittlerweile hob i damit umgehn glernt und über di Jahre gibts do weniger Gründe zur Eifersucht. Seit geraumer Zeit san des olls Markenkollegen, des mocht des olls deutlich erträglicher

Okay, weiter im Text... Wie er do vo Malta zruck kummen is hot er mir glei amol von sein Plan dazöhlt, dass ma im Sommer in Richtung Norden fohrn - "a por Länder eifärbn und Gegend schaun" hot er gmant. Des wor recht bescheiden ausgedrückt tät is manen - des worn para 28 Tog und knoppe 10.000 km, auffi bis Oslo und Stockholm, vül in Dänemark usw. Des wor a geile Tour, am vorletzten Tog samma durch 7 Länder gfohrn, vo Belgien über Frankreich, Luxemburg, Deutschland, Schweiz, Liechtenstein nach Österreich. Und auf der Tour worma des erste mol in Eicklingen bei Celle, des is Nähe Hannover in Norddeutschland oben. Er hot nämlich auf Malta do ane Leit kennen glernt, die ma do besucht hobn und mittlerweile worma über 10 mol do oben owa des is a andere Gschicht. Überhaupt wor die Tour für mein Chef a bissl a Initialzündung wie ma so neideitsch sogt - do hot er des Reisen für si entdeckt bzw. sei Art zu reisen gfundn und des taugt mir scho a bissl dass i do überoll mit hin derf. Owa nachdem er net fliagt und von seefest weit entfernt is bin i do holt die anzige Option

I glab irgendwann in der Zeit hot er mir dann an schicksalhaften Vorschlag gmocht: Er hot mi gfrogt wos i von der Idee holt, dass i eam 500.000 km weit bring und dafür verkauft er mi dann am Ende net. Wie er an der Stelle von da Gschicht immer sogt: "I hob sein Schweigen als stille Zustimmung genommen" - tjo, wos sull i sogn...

Wo ma mir überoll worn hob i mir chronologisch net damerkt owa die nächste große Tour wor dann für Frühling 2017 geplant: Spanien und Portugal und olls wos am Weg liegt. Da Ghandi lebt nämlich in Tarifa, des is wirklich ganz im Süden vo Spanien, also wirklich ganz im Süden. 200 Meter vo durt fohrt die Fähre nach Marokko weg

Jo dann samma Ende März 2017 los owa 6 Tog später worma wieder daham wal si a Weisheitszahn gmöldet hot, i da Schweiz homma umdraht und wal da Chef die Hitz net vertrogt und ihr deswegen so gut wie möglich ausweicht wor des Zeitfenster für die Tour vorbei und mir samma dann a Johr später noch amol los gfohrn. ... 2018 homma dann die Reise in den Süden wie geplant gmocht, des wor die Route:

Und am ersten Tog von der Tour worn bei mir die 250.000 km voll, genauer gesagt am 23.03.2018, do stehen wir irgendwo im Ennstal:

Do wor er a bissl nervös vorher sog i eich - des wor komplett Neuland, in Skandinavien wor er scho früher amol owa der Süden is eigentlich net sei Gegend. Owa die Tour wor a Traum und do wor i dann des erste mol am südlichsten Punkt vom europäischen Festland in Tarifa:

Do worma u.a. in Monaco (nur Stau), Andorra (5 Meter Schnee), Gibraltar usw, Marokko owi is er ohne mi, do hot da Ghandi auf eam aufpasst wos a dringend nötig wor wie i ghert hob owa des sull er eich sölwa dazöhln wenns is. Auf der Tour hob i dann so richtig gmerkt wie eam des taugt do mit mir in da Wöltgeschichte ummadum kurven und wals am Weg wor worma dann a glei am westlichsten Punkt vom europäischen Festland: am Cabo da Roca in Portugal

Des is a ziemlicher Touri-Spot wie ma siegt, weiter westlich hot er mi net hinstölln kennen

31 Tog, über 11.000 km und extrem vül Eindrücke homma do mitbrocht - do hob i a meine ersten gröberen Narben her, genauer gesagt aus Pigra in Norditalien - a a Gschicht, die er eich beizeiten dazöhln sull

Jetzt kummt des peinlichste Kapitel unserer gemeinsamen Geschichte: ca. 3 Wochen nachdem wir do wieder daham worn is wos passiert: Mei Motor hot den Geist aufgebn und mir samma do am Scheideweg gestanden:

Da Bruno hot dann kurz überlegt und nach Abwägung aller Faktoren beschlossen, mir einen neuen Motor zu spendieren - wieder a guate Idee! So hot unser Gschicht zu diesem Zeitpunkt noch ka Ende gefunden - ganz im Gegenteil!

Zu der Zeit wor dann a scho klor wo es als nächstes hingehen wird - auffi zua, ganz auffi! Wie er mir den Plan von der Sommertour 2019 unterbreitet hot wor i Feuer und Flamme: Ans Nordkap, geil... In Norwegen is überoll a 80er, wos gibts geileres?  Wie i dann die geplante Route im Detail mitkriagt hob wor i der, der a bissl skeptisch wor owa mi frogt jo kana... Tschechien, Polen, durt hot er am ersten Tog noch so a olte Kistn augschaut und tatsächlich kaft, dann kurz Ukraine und Weißrussland, Kalinigrad, des komplette Baltikum, Finnland durch auffi bis ans Nordkap und Norwegen zruck owa mit an größeren Abstecher nach Schweden. Dann noch durch Dänemark und Deutschland ham, schauts eich des au:

Leitln, des wor a Wahnsinn - 37 Tog und über 14.000 km, des klingt jetz amol gor net so tragisch owa wemma bedenkt, dass ma 2 Tog in Riga, 2 Tog in Tallinn, 3 Tog irgenwo mitten in Finnland in Lapua, 3 Tog auf da Nordkapinsel, an halben Tag in Bergen und noch amol 3 Tog bei unsere norddeutschen Freind quasi gstandn san wor die restliche Zeit scho vül auf da Strossn - und wie gesagt a por 1000 km mit an 80er  Owa do oben stehen bei 5 Grad am 1. August kurz vor Mitternacht wor allan scho die Reise wert

Do werd i fost a bissl nostalgisch wenn i so nochdenk wos mir scho olls miteinander erlebt hobn. Abgesehen von den großen Touren worma i was net wie oft in Deutschland, außerdem San Marino und Rom folln mir ein, in Vatikanstadt hob i a net mit dirfn und wal ma grod dabei san: Nach Aland hot er mi a net mitgnommen, sunst wor i owa überall wo er a wor.

Und des miassts eich vorstellen: Mir samma sogar a zweites mal do nach Tarifa owi gfohrn, diesmal über Paris und westlich von Madrid owi zua und auffa zua dann da Küstn entlang so wie ma 2018 owi san. Ende Oktober 2021 wor des - do hot da Ghandi nämlich sein 40er gfeiert und uns eiglodn und do worma dann ua zum zweiten mal am südlichsten Punkt vom europäischen Festland

Ganz ehrlich: des hätt i mir 3 Johr vorher net annähernd tramen lossn, dass i noch amol durt stehn wer. Am Rückweg homma dann sogor an Beifahrer ghobt, der is nach Malaga owi gflogn und den homma dann a bissl Gegend zagt wos ma mir scho kennt hobn. Wobei ma do ehrlich sogn muass dass ma do sehr zügig auffa san, in 4 Tog worma daham owa trotzdem vül gsegn.

Wos abseits der ganzen langen Reisen a amol gsogt ghert: Wos der mir scho olls in mein Kofferraum glodn hot und wos i scho olls ummadum gfihrt hob tät do den Rahmen sprengen, des kennts eich net vorstellen wos der talweis auffihrt: do hot er vor etliche Johr para 40.000 Typenscheine kaft, ca. 10.000 davon in Amstetten und die homma bei mir eipockt und samma ham gfohrn, do bin i schen in die Knia gangen sog i eich, Papier is furchtbar schwer... Mir worma a mehrfach gern gesehen bei diversen Siedeleien, oft a mit Anhänger wal i jo abgesehen von meiner Vollaussatuung natürlich a a Anhängerkupplung hob... In die letzten Johr hob i tonnenweise Lego von A nach B und wos was i wohin überall gfihrt, mehr als amol wor i so dermaßen kleschvull gramt, dass des nur mehr mit 3D -Tetris machbar wor. Er lobt meine Geräumigkeit regelmäßig wos mi natürlich sehr stolz mocht, wal schließlich hot er si jo net zum Spaß an Kombi kaft. So, jetzt bin i scho wieder abgeschweift, wo worma? Ahjo, 2021 glab i oder? Do worns dann irgedwann amol 400.000 km und bis aufn Motor is bis heut recht wenig tauscht gwordn, i hob immer noch die ersten Stoßdämpfer drin zb, wos besonders erstaunlich is wemma bedenkt wo er mi scho überall hin gjeikt hot - pah, do wor bei weitem net überall mehr a Stroßn oder a nur a Weg, des tät a den Rahmen do sprengen

Heuer im Frühling samma dann wieder los gfohrn wal do im Südosten wor die Europa-Kortn noch unerträglich weiß - "Balkantour" hot er gsogt da Bruno, do san noch amol 10 Länder zum besuchen. Die Route für Frühling 2023:

Pah, spannend hob i mir gedocht owa wos sull scho sein. Najo, a Nebenhöhlenentzündung kau sein - also bei eam, net bei mir  Wieder homma umdrahn miassn, bis Nordalbanien samma kummen und von Skodra samma an an Tog ham auffa, des wor wieder a Etappe mit über 1.000 km an an Tog. Des wor net die erste Etappe in der Art owa für eam wahrscheinlich die anstrengendste wal richtig fit wor er do wie gesagt net owa wie a schon diverse Herausforderungen die Jahre vorher homma des a miteinander gschofft - und wer kau scho von sich behaupten, dass er amol von Nordalbanien in an Schwung ham gfohrn is  "Des wird die letzte große Tour" hot er vor der Abfahrt zu mir gsogt, "des moch ma noch und dann brauchst nie mehr so weit furt vo daham" - tjo, i denk dass ma des in absehbarer Zeit noch amol angehen wal i hob des Gfühl, dass des noch net des letzte Kapitel in unserer Story wor, do geht noch wos...

So, jetzt muass i eich amol a por Zahlen um die Ohren schmeißen, obs eich interessiert oder net: i hob 36 Länder befahren dürfen, para 200 von die 400 Landkreise in Deutschland hob i a gsegn, am Stelvio worma auf ca. 2.800 Meter oben und in Dänemark unter Meeresniveau, i wor wie gesagt zwa mol am südlichsten und je amol am westlichsten und nördlichsten Punkt vom europäischen Festland. Dann samma auf diverse Mega-Events gfohrn, Holland, Polen usw und unzählige Male bin i bei Platzln gstandn, wo net leicht a  Auto hin kummt, a por Beispiele:

Südspanien

Dänemark

Lettland

Diverse Narben, die ma uns über die Jahre eingefangen haben zeugen von einigen ungeplanten Zwischenfällen, owa dass i ka Oldtimer im erhaltenswerten Zustand werd wor scho vor langer Zeit relativ klor

I kennt do noch ewig so weiterschreiben owa i bezweifel sowieso, ob si des jemand überhaupt bis do her durch glesn hot - owa des is mir a wurscht. Des hob i nämlich mit mein Besitzer glab i a gemeinsam: Mir is wurscht wos andere Cachemobile über mi denken! Mir siecht ma mei forgeschrittenes Alter wemma genau schaut scho a bissl an - mein Chef übrigens a

Jo, jetzt steh i do mit meine 500.000 KM am Tacho (wobei derzeit sans ca. 497.500, i hoff dass die nächsten drei Wochen nix unvorhergesehenes passiert) und hoff, dass si am Sonntag, dem 16.07.2023 so viele Cachemobile wie möglich am angegebenen Parkplatz einfinden werden und vielleicht moch ma dann a gscheites Gruppenfoto. Mir samma auf jeden Fall durt und so wie i mein Chef kenn wird der des wahrscheinlich relativ guat hin kriagn, dass es dann echt 500.000 san. I gfrei mi schon wal i hoff, dass er mir do vorher a gscheite Wäsche spendiert

Leitln, mir segn uns Sonntag, 16.07.2023 ab 18:00 an den angegebenen Koordinaten, gach hob i a por Getränke im Kofferraum - Plotz warat jo gnua  Und gach bringt da ana oder die andere a wos mit für die allgemeine Verköstigung, wer was... I gfrei mi auf jeden Fall schon wal i glab dass des afoch a bissl gfeiert ghert. Also dann bis bald im Wald