't Slot
Op sommeige olde kaerten van Dieze ku-j een enkele keer de name ’t Slot tegen kommen. Dit is de name van de boerderi’je Erve ’t Slot die an de slotsteeg nummer 1 ston. De andudink ”Slotsteege” stöt aoste närgens vemeld, allenig op een mititaire kaerte wöör een skotsveld op is an-egöven.
Of dit te maken ef met de skietbane, bi’j de Pelikaan, of dät ter een ooit een ofweergeskut ef estaon dan wel dät ooit is bedacht döör iene neer te zetten, is mi’j onbekend.
aangegeven schootsveld op de militaire kaart. (bereik Dieze en Holtenbroek)
De skietbane bi’j de Pelikaan kan ik mi’j nog wel erinneren . . toetertied wier an ärtnekkige, eigenwieze, wärkskuwe wärklozen die zich döörven te melden bi’j ’t GAK nog wel ies een baentien an-eböden as kogelvanger op de skietbane. Maer döör wil ik ’t now ook elemaole niet aover ebben.
Wat wil, ’t geval . . . op ien van mien zwärftochten deur de umgèvink van Zwolle tröf ik bi’j de Centrale (h)Ärculo, een wat oldere kerel, Bert.
Umdä-k nogal druk met de camera bezich waere umme de gaonde zaken vaste te lègen en krabbelties in een notiesiblukkien maken vreugen Bert mi’j o-k soms van de pers waere.
’t Antwoord was dudelijk . . Nee . . Maer ik make wel antekeningen en bekieke later de foto’s en meugelijk make ik der dan nog een klein veraeltien van die ik in ’t Zwols skrieve. Ik vertellen em dä-k dät allenig maer (h)obbymatig doe umme ’t Zwols as dialect te blieven gebruken. Die beeld-veraelties gaon meestens aover zaken die in Zwolle of umgèvink gebeuren en die stuur ik dan laterder wel weer naor anderen die ook belangstelling ebben veur ’t Zwols en Zwolle en doe dät via internet.
Bert kwamp toen met een verael veur de draod aover veer lindebomen op een olde terpe an de uidige Middelweg naobi’j de dierenweide, wöör vrogger een boerderi’je ef estaon die in verband met de uitbreidingen van de stad, de anleg van de ver-oogde A28 en de geplande komst van de wiek Aa-landen, in 1956 is eruumd. In disse boerderi’j is ij geboren en die sporen bint definitief ewist. Allenig de veer lei-lindes staon der nog steeds as ienigst oriëntasiepunt van wat ter ies wazzen. Op een gegèven moment kwamp de opmerking dät Bernt der nog foto’s van ad. Tsja . . . dan weet ie ’t wel e? . . ikke skooien of ij mi’j die ook kon toesturen.
boerderij: ’t Slot - Slotsteeg 1 - Dieze
En dät ef Bert edaon . . van de boerderi’je en van een skilderi’je die deur een Rotterdammer is emaakt as dank veur ’t der tiedelijk verblieven op de hoeve tiedens de ongerwinter 1944.
aquarel - T.J.Jansen - nov.1945.
Umdä-k now ’t verael van Bert adde mos ik netuurlijk ook èven mien ni’jskierig-eid op de proef stellen en ies kieken o-k ’t zelf ook nog konne vinnen. En zie ier . . . de (linde-)bomen staon der nog en bint zels as zodanig aoste etzelfe as op de olde foto.
veer leilindes op een olde terpe – der is maer weinig veranderd.
't Slot
Op een kleine bult lans de weg staon veer leilindes op een ri’je.
De boerderi’je die der eerder ston . . die is niet meer
die ef ’t veld mutten ruumen umdät de stad der an zat te kommen.
As dan inies de plannen wörren um-egooit,
be-oeven de bomen nog niet te wörren erooid.
Döörumme staon de lindes nog fier op de terpe,
en giet ’t medärne verkeer raozend an un veurbi’j
maer ze’j staon der wel met erinneringen an die olde boerderi’je.
Veurnaemelijk eskröven döör Görendreugien W. (Zwolse houtkunstenaar en dialectschrijver)
De skat ('cache') is niet op de angegèven plekke, maar kan wörden evunnen döör met een vörkie döör disse tekst te gaon. Niet te ärd lopen, dan mis ie het miskien. Veule plezier op oew zuuktoch.
A'j denkt 't te ebben evunnen, kiek det dan ier nog èven nao: