Esta caché atópase perto da igrexa de Sta. María de Punxín situada nunha ladeira do río Barbantiño, e que recibiu varias reformas durante os séculos XVII e XX, e curiosamente unha delas consistiu en... darlle a volta!
A igrexa atópase nunha zona elevada a carón da estrada e xunto a antiga casa reitoral, coa fonte de San Wintila, de 1876, aos pés. Neste mesmo lugar existiu unha ermida onde se conservaba un sepulcro dedicado ao santo mencionado (que non está canonizado de xeito oficial). Desde a fonte pódese acceder á igrexa por unha escalinata dobre que foi construída en 1963.
Da primitiva igrexa románica, que constaba dunha nave e a súa correspondente cabeceira de plantas rectangulares, tan so se conservan os muros laterais da nave, o arco triunfal e a ábsida. Isto foi debido a gran transformación que sufriu este templo parroquial no ano 1924, sendo a maior modificación o cambio da orientación litúrxica habitual feita para adecuarse “mellor” ao trazado da actual estrada N-541 e que consistiu, literalmente, “en darlle a volta á igrexa”: en orixe o templo presentaba a habitual orientación en sentido Este-Oeste, pero a consecuencia da execución da citada estrada a ábsida trasladouse á fachada de poñente converténdose na actual sacristía, e a porta principal de acceso dispúxose na fachada de oriente; isto fixo que se perdese a portada primixenia que foi substituída polo arco triunfal románico. Deste xeito a igrexa organizouse en sentido inverso, é dicir, en dirección Oeste-Este.
Cousas veredes!
Fontes: Románicodixital e Galicia Máxica