38 BSO de mi vida 🎸 Setting Me Up - OGolpe Mystery Cache

Traducción automática - castellano              Machine translation - English

Unha canción do álbum debut (1978)

Setting Me Up forma parte do álbum debut de Dire Straits, publicado en 1978. Este disco estableceu a identidade musical da banda, marcada polo son distintivo da guitarra de Mark Knopfler e a súa fusión de rock, country e blues. Se ben temas como Sultans of Swing acadaron maior popularidade, Setting Me Up destacou polo seu ritmo enerxético e pola súa proximidade ao estilo de artistas como J.J. Cale, unha influencia clave en Knopfler.

O significado da canción

Setting Me Up é unha peza que fala dunha relación tóxica, o narrador séntese enganado e manipulado emocionalmente pola súa parella. Primeiro, faino sentir especial para logo abandonalo, o que se resume na frase central da canción: "Setting me up to put me down". (preparándome para derrubarme). Reflicte esta dinámica de inflar expectativas para logo destruílas. O narrador percibe que está a ser utilizado e decide tomar distancia para protexerse. A resignación e o desengano que expresa a letra contrastan cunha base musical vibrante, cun marcado ritmo de rockabilly e un punteo de guitarra que recorda artistas como Gene Vincent ou Buddy Holly. Setting Me Up comparte certa semellanza rítmica con Southbound Again, outro dos cortes do álbum, e reflicte a influencia do country americano no son inicial da banda, durante a interpretación de Setting Me Up en directo en 1990 con The Notting Hillbillies, utilízase o banjo, é probable que fose tocado por Brendan Croker, membro desta banda coñecido por tocar este instrumento.

Letra Setting Me UP

Versións destacadas

A canción foi versionada por Eric Clapton en Just One Night (1980) con Albert Lee ao vocal. Lee tamén fixo a súa versión en Hiding. En 1988, a banda country Highway 101 gravou unha versión, aínda que Knopfler non estaba moi a favor desta reinterpretación.

A subasta das guitarras de Mark Knopfler

En 2024, a colección de guitarras de Mark Knopfler foi subastada por Christie's en Londres, acadando unha cifra total de 10.342.987 euros. Knopfler comentou que, a pesar de ser difícil separarse das súas guitarras, sentía que era o momento de deixalas ir para que atoparan novos donos.

Entre as vendas máis destacadas están:

Gibson Les Paul Standard Vintage de 1959, utilizada en Brothers in Arms, vendida por 810.304 euros, establecendo un récord de subasta para este modelo.

Gibson Les Paul Standard de 1983, coa que se gravou Money for Nothing, vendida por 698.048 euros.

Pensa-Suhr MK-1 de 1988, deseñada para o concerto de Nelson Mandela en Wembley, subastada por 504.000 euros.

Schecter Telecaster vermella, coa que se gravou Walk of Life, vendida por 415.800 euros. Unha parte importante dos fondos destinouse a diversas organizacións benéficas.

Parte do diñeiro recadado destinouse a fins benéficos, co 25% das ganancias repartidas entre organizacións como a Cruz Vermella Británica, Tusk e Brave Hearts of the North East. Ademais, a totalidade dos fondos da venda dunha Gibson Les Paul "Gold Top" de 2021 (471.752 euros) foi doada á fundación Teenage Cancer Trust.

Podes comprobar a túa solución con Certitude.