Folge der Geschichte und dem eingezeichneten Weg auf der Karte im Anhang. Die Cache-Koordinaten sind gleichzeitig der Startpunkt der Runde. Unterwegs findest du Holzscheiben mit den Bildern unserer 6 Insektenfreunde. Im Umkreis von 5 m von diesen Scheiben triffst du dann jeweils unsere Insektenfreude, die dir nach und nach den Weg zum Finale – der Geburtstagsparty – verraten.
Unsere Insektenfreude bewegen sich maximal 10 m vom Weg entfernt; die Holzscheiben sind alle vom Weg aus zu sehen. Seid vorsichtig mit unseren Freunden und versteckt sie wieder so, wie ihr sie vorgefunden habt.
Für diejenigen, die den Mundart-Text nicht verstehen können, ist auch eine hochdeutsche Version verfügbar. Welches Tier ist Willow? Die Bezeichnung des Tieres in Hochdeutsch ist x. Schreibe eine E-Mail an x@partybombe.de und du kannst dir die Übersetzung herunterladen.
Im Finale findet ihr einen Stempel, der bitte in der Box bleibt.
Es besteht ein Nachtsuchverbot!
Viel Spaß bei eurem Abenteuer.
Es klaane Heipfaar un seine Kameraden
"Willow, wart emol!"
De Heipfaar-Mam kam zen Töchterle gehuppt und frug, eb se nischt vergassn hätt.
De Willow hot scharf nochgesunne, ober es fiel er nischt derzu ei. Se war ober ah net bei dr Sach und dacht ner do dra, dass se ze speet ze ihrn Kameraden komme wür.
"En Schmatz will iech", saht dem Mam.
"Mam, los miech lus, de CoCo wart of miech."
Knutsch.
Nu is de Willow glei zer CoCo gehuppt, die dorten wuhnt, wu dos weiße Heisel stieht. Die soß mitten in en Netz und dernabm hinge schu zwee fertsche Spinneweben.
"Na, Willow, kimmste endlich zun ohhuln! Sah ner emol har, wie lang ich lauern must, zwee Netze sei derbei fertig wurn."
De CoCo ließ siech vum Baam runner un hot ihrer besten Freindin zen Geburtstog grateliert. Se gob er ah e Geschenk und de Willow hot siech darb gefräät.
"CoCo, dos is aber schie, dass iech nu a e Sääl hob, so lang un stark, dass ich endlich Leis fange kaa, wie e Cowboy."
"Komm ner, du Cowgirl, mir wolln nu endlich wos erlaabn - ober die annern missen mer erscht noch ohuln.
De CoCo grablet iebern Waldbuden un de Willow huppt drnam har un immer, wenn se in dr Luft war, saht se:
"Iech" - hupp
"sah" - hupp
"de" - hupp
"Bach" - hupp
Un a dan imgefollnen und entworzelten Baam sooch se, wu dr Herr Spietzmaus drinne wuhnet. Dos war ober e alter Zenkhammel, dar immer ze spreuseln hatt. Emol hot er sugar der Willow hinnerdrein gebläkt, dass er se es nächste Mol frassen wür, wenn er se derwischt.
Dar Dingrich ka ober nischt derfür, dar hatt halt kä gute Erziehung, is scheu un will sei Ruh hobm, spreuselt gern un gecht jeden wag, dar ne ze nahnd kimmt. Genausu schlacht erzung is sei ganze Verwandtschaft.
In der Bach war heit en Haufm Wasser un mer muss de Zung gerod ins Maul namme, wenn mer nieber kumme will.
Eins, zwei, drei - de Willow nohm jede Menge Alauf un huppet mit aller Gewalt mit ihre sechs Bää ab, se huppet huch un weit und kam a gut driem a, aber es Herzl hot ganz schie gebumpert, su aufgeregt war se bei dan Satzel.
Un wie gings dr CoCo? Na, die hing sich afach an ihrn Foden und baumelt von Ast ze Ast ieber de Bach wag, dää Äst warn soot do.
"CoCo, guck emol, do is e Wagweiser zen Karlo senn Haus" un se zeiget of ene rut-weiße Stang. "Dorten gieht dos Grundstück von unnern Kumpel Karlo lus, dar e Sommerkaibel mit sieben Punkten is.
Korz drauf war a schu de Sommerkaibel-Mama ze hörn, die natierlich a siebn Punkte hoot. Un die resoniert uhne Luft ze huln von der grußen, allen Buch runner:
"Nu saht eich blus emol dan Waldbuden a. Dos daamische Echerl haut egal de Scholn von de Bucheckern runner, wie's ne grod passt. Su eine Lumperei!"
Itze kam de Sommerkaibel-Mam sachte de Buch runner un jeder Baamschwamm, ieber dan se ben runnerkrabbeln kam, hot unner ihrn schwern Schritt gewackelt.
Nochert stellt se siech of de vier Hinnerbää un mit die restlich zwee Bää hot se wie e Dirichentin en Karlo de Benammregeln eigetrichtert:
"Sei mer fei Punkt sieme derham!
Sei freindlich und grüß mer alles, was in Wald kreucht und fleucht!
Sei nich e su neigierig, erscht racht nich bei de Menschenleut!
Mach nich jeden Blödsinn miet!
Un vergass net, soot ze assn un ze trinken! (Es kost nischt!)"
"Willow," saht se und dreht sich zu ihr rim, "iech wünsch dir a alles Gute zen Geburtstog - un wenn de wieder derham bist, grüß mer deine Mam."
Nochern gob se dr Willow e Geschenk, womit die in Labn nich gerachnet hatt, en ruten Armreifen.
Dan hot de Willow glei in ihrn Rucksackel zun Sääl von der CoCo gepackt, dass er nich verlorn gieht.
-
Ollezamm loffen ner a paar Minuten un schu warn se bei ihrn Freind Rocky. Bei dr Menschen-Schutzhütt war er mit senn vielen Verwandten drham. Glei drhinner im Wald, versteckt hinner en Baam, log dr Ameisnhaffn. Nabm dr Hütt hat mer e herrliche Sicht ieber Falder, Walder un in Himmel zamst Sonneauf- un unnergang. Mer sooch ah de Dörfln im Tol, ober das hoot ne Rocky net intressiert, denn dar wollt Abenteuer erlaabn un drim ahm hatt er siech ah of das mit senne Kameraden eigelossn.
„Nu, Willow, du grienes, alles Haus, Glickwunsch zen Geburtstog - hier, fang! - CoCo, du Spinnerne, Glück auf“.
„Haahaa, Rocky, wie lustsch“, CoCo grinst un verdreht de Aang.
Is do dr Rocky salber drauf kumme, oder hoot sich dos Geschenk de ganze Familie ausgesonne? ‘Ach’, dacht de Willow, ’dos is doch suwos von egal’ un hot sich efach nur übers Geschenk gefräät: „schinn Dank, Rocky, fier die Taschenlamp“.
„Alles gut, kää Ding“, saat dr Rocky drauf „dos Gliewärml, wos do drinne lächt, hob iech salber gefange un neigesperrt.“
„Woooos? - Du hast wos gemacht?“
Dr Rocky haut sich ver lachen of de Oberschenkel, „Dei Gesicht hättste itze mol sah solln, wie du itze geguckt hast.“
„Iech hätts wissen missen, das de miech bluß verolbern wolltst“ mähnet de Willow un alle finge miet ah ze lachen, CoCo, Karlo - un dr Rocky suwiesu. Nochdam se siech wieder beruhigt hatten, stecket de Willow de neie Taschenlamp nei in Rucksack ze de annern Geschenke un wetter gings mit ihre Kameraden ofm Waag zur Abenteuer-Geburtstagwanderung dorch’n Wald.
Se loffn ze dan Krater hie, wu de Socke-Famile wuhnt. Die sei e wing klimaempfindlich, de Wärm, es Licht, de Feuchtigkäät missen passen und windgeschitzt und nich ze laut solls sei. Dos alles missen se unner en Hut bringe, dass es fiern Familienwuhnsitz passt. Socke ka do nischt derfier, aber daswaagn werd er Angsthos genannt, ah wenn’s nich nett is. Er is halt e empfindlicher, ängstlicher un usichrer Raupmgung, dar immer freecht: ‘Denkst de?’, ’Solltn mer nich lieber..’, ’Iech bie mer net sicher.’
Dos is e gefundnes Frassn fern Rocky, dar net aufhäärn kaa, ne Socke ze ärgern, aber de annern Kameraden malden siech schu, wenn’s ze schlim werd un song ne ordlich de Meinung.
De Socke sieht aber richtig schie aus als Raup, noch schenner speter als Schmetterlich, er brauchet engtlich gar net su usicher ze sei, aber dos macht ne halt aus.
„Hallooo!“ rief de CoCo in dan Krater nei. „Sooockeeee“! Un schu kroch
Socke im zickzack, zickzack dan Krater nauf un saat: „Glück auf! - Iech gratelier dir ah zen Geburtstog un wünsch dr, dass de heite soot ze Naschen hast!“
„Hob när ah schinn Dank, mei Freind Socke“, saht de Willow un dr Rocky froochet „Alle Socke, alles in Butter?“ un klatschet of dan seine galbgriene Haut.
„Autsch!“ soget Socke un rieb siech die Stell mit sen dreizahnten Bää.
„Bist de bereit, mei Freind, nochert giehts glei wetter.“
„Wart emol, ner noch dei Geschenk, mei Mutter hoots rausgesucht, gekaaft un eigewickelt.“
In dar Zeit, wu’s de Socke hult, fing dr Karlo ah, in sen Rucksack nooch Assen und Trinken zu suchen, dää wos hat sei Mama gesaht: ’Vergass net, soot ze assen un ze trinken.’
Er ruffet: „Möcht jemand von euch ah wos von dr Asserei oder Trinkerei hobm?“ un schwenket e Glos voll Blattleis un e Flasch Berkensaft, dan de Mama frisch gezappt hatt, aber alle Kameraden lehneten ab. Se sahten: „Nee Danke, Karlo, ass emol salber, wenn de Hunger hast.“
Er schraubet dos Glos auf, fing drei oder vier Leis un hoot die mit Genuss gassen.
Dr Rocky saat zer CoCo: “E schienes Netz hast de derweil gesponne“.
„Schin Dank, Rocky, dos mach iech jedsmol, wenn iech warten muss.“
Nochert kam Socke mit sen Geschenk un gobs de Willow. Es war ne Fader von en Grünspecht, die richtsch gut zer Willow ihrn grün Panzer passet. „Herrlich, Socke - un schinn Dank.“ De Fader kam ober net in Rucksack, die hoot de Willow glei an ihr Kopp festgemacht und sooch nu aus, wie dr Oberhäutling dare ganzen Gesellschaft.
„Hey du, nich mit fremde Fadern agaabm“ un nort kam e kichern von ubm. Alle soong nauf un drkannten de Ruby, wos ene Mauerbien is. Nu warn alle Geburtstogsgesellschaftskameraden beienanner.
„Nu, Rocky, du siehst su klää aus von do hubm.“
„Haha, wie witzreich un komisch, iech lach miech kaputt, Ruby.“
Ruby hot ne Rocky gern emol ewing aufgezuung, dä dar kaa austääln, aber net immer eistecken un wär gern der Gräßte ieberall un net när in sen Ameisnhaffn.
„Williow, alles Gute zun Geburtstog, e Glos mit Pollen gab iech dir, hier, fang’s auf!“ Sie fing’s, hoot glei dra geschnuppert un saat: „Herrlich, Ruby, racht schinn Dank. Iech frää miech besonnersch, weil iech wess, wie schwer’s fier euch Binne is, suviel Pollen ze sammeln bei dan bissel Nahrungsahgebot.
„Namm’s un lost’s euch schmecken.“
Ah es Glos kam vorsichtig in Rucksack nei un nochert krabbelt, kroch, flug un rutschet de Geburttogstruppe Karlo, Socke, Willow, Ruby un Rocky nooch ihrn Wanderziel zer Party in Wald.
Korz, eh se dort ahkaame, höreten se e lautes, aufgerechts Gepfiep un Geflatter von en Vugel. - E Vugel, dr Feind von alle Geburstagswanderer, o je! Bei allen schlug es Herzel bis zer Brust oder Kniekahl, wu’s ahm gerode sitzt, aber bei alln is es in de Husn gerutscht. Alle hobm sich e sichers Platzl gesucht un erscht emol gelunzt, wos lus is. Es war e Rutkallemama, die aufgerecht ruffet: „Mei Kind, mei Kind!“
Of’m Waldbuden log e Nast un dernabm e kläänes Rutkallekind, dos heuln und ängstlich piepen tat. Es hielt siech en Flügel un hatt wohl e Faderle gebrochen un dos tot dan Kindel natierlich wieh. Sei Mama war aufgerecht un wusst siech net ze halfen.
Dos hoot de Willow gemerkt. „Iech gieh emol dortn hie un versuch ze halfen“ bischbert de Willow ze ihrn Kameraden. Dr Karlo kriecht gruße Aang un schüttelt ganz sehr en Kopp un Ruby flug ver Angst ner noch im Kreis, dr Rocky hot de Ärmel huchgekrampelt un keck geguckt, de CoCo hing an Foden un musst noch ieberlegn und Socke log zesammgerollt in Deckung hinner en Blaatel un saat gar nischt.
„Mir wolln doch wos erlaabn, das gibts hierde un iech gieh itze hie.“
un schu huppet de Willow zu dar Kutkallemama, hult zweemol tief Luft un grüßt freindlich.
Derschrocken drehet sich die Mama rim, mit en Schnobel gefahrlich nah an dr Willow, un fregt: „War bist dää du?“
“Wenn iech dir’s verrot, musst de mir versprachen, dass de mir un mein Kameraden nischt tust un uns nich frisst, mir woll’n dir un dein Kind halfen.“
„Kameraden? - Halfen?“ es Rutkalle war erscht ruhig, gucket ihr Kind ah un es runnergefallne Nast, dann wieder es Heipfaar mit dr Grünspechtfader of’n Kopp.
„Iech versprach dir un dein Kameraden, eich nischt ze tu un eich net ze frassen.“
Do dreht sich de Willow im un ruffet jeden Freind enzeln aus‘n Versteck. Do kam der Rocky gerannt un rief, dass er alles klärn wür und de Willow soll siech hinner ne versteckn, de Ruby kunnt noch nich wieder grodaus flieng, noch dan ewigen kreiseln war ihr noch schlacht und en Karlo schlotterten seine sechs Bää in de Socken un er frug „Werkliich?“.
Aber wu war de Socke? Dar hing noch versteckt unner dar galben Blum un hoot siech ner sachte ausenannergerollt un is im zickzack zickzack zer Willow kumme.
Es Rutkalle dacht: ’Du meine Güte, dos is e Fastassen un alles is su schie ahgericht un von jeden wos derbei. Mir troppt dr Schnobel: Heipfaar, Raup, Spinn un sogar ene Ameis. - Aber dos kaa ich net machen, wo se mir su lieb un mutig Hilfe ahgebuten hobm.’
Als alle beisamme warn, machet de Socke als erschtes dos, wos er an besten kunnt un hoot dos klääne Vugelkind getröst. Er lies siech zeign, wus wieh tot, versuchet alles erträglicher ze machen un schaffets, dass dos Kindel aufhäret zu heuln.
Dann kam de Willow zen Rocky un frug, eb er noch soot Kraft hät, e Sääl ze werfen, ze verknoten un es Nast nauf ze ziehe. „Nu freilich, haar dermiet.“ De Willow hulet das Sääl aus ihrn Rucksack un frug de CoCo, ob’s Racht wär, es war je e Geschenk gewasen, de CoCo hot gelacht un genickt. Nu wur zesamm es Sääl im es Nast geschnürt, Rocky zug dra un es Nast wur wieder richtigrim gedreht.
„Wos fier e Durchenanner“ ruffet de Rutkallemama, als se ihrn Haushalt sooch, weil vieles rausgefalln war un drackig aussooch.
„Ruby, guck diech emol noch en Baam im mit ener orndlichen Astgobel fer dos Nast“, rief de Willow noch ubm und Ruby flug glei lus un fand ah wos Passendes in der Nähe. „Iech hob en guten Baam gefunne!“
Zesamme mit Rocky un Willow zug se es Nast ze dan wunnerschinn alten Baam un nochern flug de Ruby mit dan en Säälende nauf. Nong wur dos Nast von allen huchgezugn un wie’s of’n Ast war, krabbelt de CoCo nauf, schubst es Nastl noch e bissl ah un es rutscht fast von salber in dan Armreif als Unnergrund fier en bessern Halt. CoCo fung ah, dos Nast mit Spinneweben an Ast und Armreif fest zemachen, dass es nong besser haltn kunnt.
Karlo un Rocky buckelten flessig die Sachen, die se feder brachten, in dos neue Rutkalle-Derham, und dann konnt de Rutkalle-Familie wieder eizieh. Socke nohm Abschied von sen klenn neue Freind, dar schu wieder fröhlich zwitschern kunnt.
„Iech sog Dank fier eire Hilf un fier unner neues Derham“ flötete de Rutkallemama und de Kameraden dankten, dass se nicht geta kriecht hatten. Willow, Socke, CoCo, Ruby un Rocky sogeten „Tschüss“ un huppten, krabelten un flung wetter zer Geburtstogsparty.
Se hobm geredt un derzählt un jeder hatt seine eigne Geschicht vun dan Rutkalle, jede war annersch un es war ein Radau in dare Gesellschaft.
Noch e paar Minuten kame se an dan Baamstamm ah, wu gefeiert waarn sollt. De Willow-Familie un de Ahgehöring dr Kameraden hatten heimlich alles geschmückt un racht schie gemacht un nu wurn se willkomme gehaaßen: „Ieberrasching!“
Es gob Blume, Kraiter, Pollen und Läus ze assen, de Brüder von dr Willow macheten e schie Musikel, indam se de Vorderflügel anenanner riebn, de Gliehwärmeln hobm gelecht un es war wunnerschie.
„Muttiii!“, de Willow is ze ihr hiegehuppt un hot sich fest an se gedruckt, als hätts se se verzn Tog net gesah, aber es warn doch när zwee Stunne gewaasen.
„Willow, mei liebes Madel, noch emol alles Gute!“
Un ah de Kameraden rannten, krabelten oder flung ze ihre Illern un alle hobm siech imarmt un gejuchtz.
---
Un wenn se net gestorbn sei, feiern se heit noch.