Avoa. Concello de Taboadela, Ourense.
Con este caché convidámosvos a ver o mural "Avoa" que se atopa en Taboadela, e que aproveitedes para dar un paseo polo concello e a súa contorna.
Taboadela é un concello a menos de 12 kilómetros de Ourense capital. É un municipio rural, cun patrimonio natural e patrimonial facilmente visitable e por onde discorre, ademais, a Vía da Prata do Camiño de Santiago. Hai varias rutas de sendeirismo, que se poden facer a pé ou en bicicleta, para descubrir a súa natureza. Pero eses recunchos quedan para contar noutros futuros cachés.
O mural “Avoa” é un traballo de Mon Devane, artista urbano galego coñecido polos seus murais fotorrealistas de gran formato cun distintivo toque de turquesa. Un dos seus traballos mais recentes é “A gaiteira real”, mural que recibe aos visitantes que entran a Ourense pola autovía A-52.
O mural da “Avoa” é unha recompensa para os visitantes que veñen e paran a visitar o pobo. Está no camiño que leva ao Centro de Saúde, a Biblioteca ou a Escola Infantil, zona moi concorrida polos veciños de Taboadela. Pero queda agochado das miradas indiscretas dos visitantes de paso que atravesan o pobo pola antiga estrada de Madrid sen baixar do coche. Se non vas expresamente a velo, non o vas poder desfrutar.
Esta obra retrata a dous dos nosos veciños que representan o esforzo, a dedicación e o valor da muller rural en Galicia. É unha homenaxe visual as avoas e traballadoras do rural galego, que non só coidaron do campo, animais, fogar,... se non que tamén sacaron tempo para criar as súas fillas e fillos e os seus netos e netas. Co seu traballo, coidado, esforzo e constancia, deron forma á nosa maneira de vivir, ás nosas tradicións e á nosa terra.
A vida no rural galego non foi nunca sinxela; esixía forza e resiliencia. Desde as primeiras horas da mañá, estas mulleres bravas dedicábanse ao traballo no campo, ao coidado dos animais e á xestión do fogar, moitas veces combinando estas tarefas con empregos fóra da casa. As nais e avoas do rural galego son auténticas heroínas cotiás e sosteñen a tradición e a natureza deste lugar, desempeñando un papel fundamental con dedicación incansable. Son as gardiás das costumes ancestrais, transmitindo de xeración en xeración o amor pola nosa terra e pola nosa cultura.
O mural “Avoa” está acompañado dunha gran “t” branca. Esta letra, pequena e sinxela, deixou de ser un simple trazo e converteuse en algo que nos une. Arredor da “t” creceu un sentimento de agarimo, de pertenza a este lugar que chamamos casa: “eu son de Taboadela”. Esta “t” converteuse nun símbolo que levamos con orgullo e que tamén recibe a súa merecida homenaxe nun lugar de honra acompañando este mural de Mon Devane.
Como premio por achegarvos a este lugar atoparedes un caché mediano, magnético, agochado con agarimo para agradecer a vosa visita. A caixiña permite algún pequeno intercambio.