Ponte metálica de Castrelo de Miño
A ponte metálica está xusto por baixo do salto de Castrelo, a menos de 1 quilómetro da presa. Foi construída en 1907 en substitución doutra medieval, xa había moito tempo arruinada.
A ponte está coroada no centro, a cada banda, por dous grandes arcos metálicos, de trazado e técnica avanzada para aquela data. A contrata foi adxudicada a Talleres de Zorroza, de aí que apareza este nome na placa da ponte coa data de 1907. A recepción total da obra do tramo de estrada realizouse en 1912.
Ademais de resolver a comunicación entre ambas as dúas beiras do Miño entre Castrelo e Ribadavia tivo, co tempo, a súa imaxe unida aos tráxicos sucesos da Guerra Civil. A súa altura (e daquela non había outras pontes comparables na contorna) e o pulo da corrente que pasa por debaixo facían dela o instrumento perfecto para cometer asasinatos en canto o golpe de Estado de 1936 abriu a veda.
A comarca do Ribeiro viña sendo escenario dun activo movemento agrario. O triunfo do golpe desatou a persecución contra todo o que soase a progresista e demócrata. As vítimas do “paseo” eran precipitadas dende o alto, coa confianza de que a corrente arrastraría os corpos. Actualmente algunhas entidades están solicitando a declaración da ponte de Castrelo de Miño como lugar de memoria.
O caché
Trátase dun caché pequeno, magnético. Contén logbook, pero necesitarás máquina de escribir. Presta atención aos atributos e non asumas riscos innecesarios.
Fontes:
Ponte de Castrelo de Miño. Unha historia viva.
Ourense no tempo - El puente metálico de Castrelo de Miño.
Talleres de Zorroza.
La Región - El puente de Castrelo opta a ser lugar de memoria.