Fjone-Treungen Fjonesundet Traditional Cache

                                                Velkommen til Fjone.

Fjone er ei lita grend med 120 innbyggjarar i Nissedal kommune. Sjeldsynte hellemålingar og gravhaugar viser at her har det budd folk i om lag 5000 år. Det fyrste du vil legge merke til når du kjem til Fjone, er Nisser, største innsjøen i Telemark, omkransa av blankskura, høgreiste fjell. Den 4 mil lange og 250 m djupe innsjøen inneheld reint, klårt drikkevatn. På Fjonesida finn du kilometervis av dei finaste sandstrender, kanskje det største eldorado for badeglede i Sør – Noreg. For at alle skal få oppleve den storslåtte naturen langs Nisser, har me eit godt utval av oppmerka turløyper i skog og fjell. Vinterstid kan du følgje oppkjøyrde skiløyper gjennom lett skogsterreng heilt inn på snaufjellet. På det smaleste punktet på Nisser, trafikerar Fjoneferga M/F ”Nissen”, som er landets siste kabelferge i ordinær drift. Ferga fraktar bilar, minibussar og passasjerar over Nisser frå 1. mai til 31. desember. I tillegg til å vere førar av Fjoneferga, driver Åshild Sollid eit handverkutsal med eigen strikkeproduksjon, samt ein kafeteria med enkel servering.

                                                                                                                    M/F Nissen
Fjoneferga M/F ”Nissen” har vore i drift sidan 1947 og fram til i dag, med eit opphald fyrst på 50 – talet. Norges siste kabelferge som trafikerar Nisser frå Fjone til Sundsodden i Nissedal, var det einaste vegsambandet for innbyggjarane på Fjone før vegen til Treungen kom i 1967. I dag blir ferga mest nytta i turistsamanheng og au noko som nyttetransport for næringslivet i Nissedal og dei nærliggjande områda. Kvart år blir det frakta mellom 5 – 6000 personbilar i tillegg til passasjerar, syklar, motorsyklar og bussar over den 5 00 m lange strekningen mellom vest – og austsida av Nisser. Denne attraksjonen er eit reisemål som er vel verd å oppleve i naturskjønne Nissedal. Velkommen ombord !