Vrouger was der ook n stille kniep achter Leerms bie t Holten Waigje. Dat is n klain boerderijtje en Jan Kort, dij doar woonde, verkocht wel n klokje aan laansvoarende schippers en boeren dij doar noar heur vee kieken kwammen. As zai honger hadden kon zien vraauw Bauchien heur ook knien veurzetten. Heur knienevlaais was n lekkernij.
t Gekke was dat Jan Kort hail gain knienen haar. t Gehaaim is laang bewoard bleven. t Wazzen wotterknienen dij zien vraauw klandizie veurzetten dee.
Vandoagde dag ligt Klaaine Draai der over t Leermster Moar, liek veur Kerkpad oet dij van Donatuskerk noar moar tou lopt. Dat was vrouger n draaibrug dij open ging as der n schip deur mos. Ol brug is verswonnen mor der kwam n goie daardehaandse weer veur ien stee dij veur ain gulden overkocht wer van gemainte Ten Boer. Brug was ooit baauwd as Brug 6 over t Eemskenoal bie Woltersom. Dou t Eemskenoal ind joaren fiefteg verbraid wer, is Brug 6 overbrocht noar dörp Ten Boer en het doar joaren laang dainst doan as Boltbrug over Damsterdaip. Rond 1980 kwam ol Brug 6 noar Leerms tou. Veur n poar joar leden is brug haldaal reneveerd. Bloots vörm is nog over van ol Brug 6.
Stoef bie brug, noast ol bakkerij, woonde Kovvertje Kort, n neef van Jan Kort van Holten Waigje, dij mit n kovver vol lappen stof bie pad en weg laip. Hoeske doar hai woond het is veur n poar joar leden bie n verbaauwing ienstört en òfbroken. Haimstee is nou te koop. Wel wait komt ter ooit n eethoeske veur ien stee doar lu vannijs lekker knien ien paan eten kinnen zo as vrouger bie t Holten Waigje. Mor eer ie knien eten kinnen, mouten ie der ain vangen.
Dizze “cache”is moakt mit hulp van lu van wotterschop Noorderzielvest. Noar Wotterschop vot is deur t vangen popeloatsie ien dizze kontrainen van 188 ien 2012 teruglopen noar 64 ien 2014. [Noorderzijlvest]
Noar n idee van Piet1949, tekst is moakt deur Nane van der Molen.
Veul plezaair en spanning bie Jan en Bauchien,
Ype