Dias isch a weidere Doas von meiner Serie "Burga ond Schlesser"
Weidere Dosa sin do:
Burg Katzenstein
Burg Auernheim
Burg Schlössle
Burg Reichenbach
Ihr kennat doch gwiß dia Reschtla von dera Burg dau domma in Hermaringa....und heit will i uich mal verzähla warum do koi gschoita Burg mehr stoht....
und wer dui Burg no nett kennt.....ha no viel besser....na lernat er se kenna....
Also oinscht vor an ganza Haufa von Joar, da gabs da domma a scheana Burg. Ha des war a richtige Feschdung. Ond der Chef do war dr Kunerich.
Na solang sei guada fromma Frau no am Leba war, da war der Kerle scho zom haba. Ellaweil ziagellos ond obherrscht wär er scho gera gwea, aber sei Frau hat em des emmer austrieba. Die hend zwoi nedde Mädla ghätt, die i heit amol Kunigunde ond Brunhilde dauf. Koi Ahnung wie die echt ghoißa hennt.
Ha ond no irgendwann isch se halt au amol gschtorba - sei Frau moin i. Worom au emmer, des wois i nett. Isch au nett wichtig für di Gschicht hier.
Auf jeden Fall hat der Kerle na vollends ogfanga durchzomdreha....i sags oich...der hat Sacha gmacht, des glaubat ihr echt nett. Ha der hat aus dera scheana Burg a Sammelschtell für des ganze Gsindl gmacht....omeglich.....echt. Ha die ganze Beese hend sich do troffa ond zsamma d´Leit überfalla ond dene ihr Vieh klaut und lauter so beese Sacha gmacht. Der war so schlimm den hend se von do o bloß no Mordhans gnannt....also i dät so nett hoißa wella....i find des sagt doch scho elles. Die hends echt wild trieba damals.
Ond seine zwoi Mädle (also d´Kunigund ond Brunhild) die hend des elles garnet glaube könna.....die send do fast drübernei komma. Weil dene ihr Vadder war halt au zom oigna Volk omeglich. Dia send emmer ärmer worra ond dene gings halt emmer schlechter. Di Mädle hend sich dann emmer guad ums Volk kümmert. Durch so an Geheimgang konntat die von dr Burg na ins Dorf. Des hat dene später au no gholfa. Aber des verzähl i nachher.
Also jetzt nommol zum Kunerich ond seine Leit. Ha moinscht die hend vor Geanga oder Herbrechdenga Halt gmacht, ha von wega....alle andre hend die piesakt und dene ihr Sach klaut....des war echt nemme schea.
Ha und oimal da hend die Ulmer doch tatsächlich da Kunerich alias Mordhans gfanga gnomma ond in da Kerka sperrt....recht gschiehts ihm...und seine Gfolgsleit hend na au a baar Ulmer gfanga gnomma, ond die hend na gegaseidig dauscha wella, ha da hat der bleede Mordhans au no a Lösegeld verlangt....so ohäbig ond niederdrächdig war der.
Ha ond irgendwann hend sich des die ganze alle Dörfla nemme gfalla lassa und hend sich zsammdo. Do send also di von Geanga, Langenau, Lauinga, Ulmer und wer wois i no ells ....in dr Johannisnacht nach Hermaringa ganga ond hend dui scheana Burg überfalla.
Dr Kunerich isch grad mit seine Saufkumpane zsamma ghockt ond war vermutdlich arg bsoffa....na auf jeden Fall hendse den glei verwirscht und der isch na tötet worra ond seine ganze Kumpane au no mit.
Di zwoi Mädla aber hend durch den Gheimgang von vorhin ins Dorf flieha kenna ond dene isch nix bassiert. Am nächschda Dag send se na nauf ufd Burg ond hend für des Seelahoil von dene Doade bedet. Aber irgendwia hat dene des au s Herz brocha denn alt send se nett worra. Dia send halt schdändig auf die Burg nauf zom beta, aber gholfa hats halt au nix meh.Ond jetzt kommt des Gruslige an dere Gschicht....heitzudog wenn dui Johannisnacht isch, na sollat di zwei Mädels als Goischter do romspuka. Glauba miaßat ir des nett...aber wer wois....
So des war jetzt die Gschicht von dera Burg. Ond wenn er Luscht hend na gangat er da no ond kukat se oich o.I han mal an Multi-Käsch noglegt....na lohnt sichs glei doppelt. Hier han i no a Schatzkarte von dene gfonda....vielleicht hilft uich di weider. Viel Spaß au wünschat familuwi
Ond passat bitte uf, wenn ir do romkraxlat....des ko scho gfährlich sei....also echt uffpassa.
Jetzt muaß i no a ganz dicks Dankschee saga ans LATeam, di hend mir hir des Käschtle vom Vorgängr ond au des alde Logbiachle überlassa, so das des jetzd a echdr "Riloded" worra isch. Gans doll liab von uich ! DANKSCHEE !!!