Espiño
ATENCIÓN: Exclusivamente en horario de 7 a 23h.
ANGIOSPERMAE / ROSALES / ROSACEAE
NOME CIENTÍFICO: Crataegus monogyna Jacq.
OUTRAS DENOMINACIÓNS: estripo, estripo albar, espino majuelo, espino albar, majuelo.
ETIMOLOXÍA: CRATAEGUS do grego KRATAIOS: forte, robusto en alusión á súa madeira, ou de KRATOS: forte e AIGON: cabra, en alusión a que as follas novas deste arbusto son ramoneadas polas cabras, que así conseguen unha grande fortaleza; MONOGYNA: por ter un solo estilo en cada flor.
DESCRICIÓN: Arbusto ou pequena árbore espiñenta de ata 4 m, que ás veces pode alcanzar máis altura. Tronco curto e algo torto. Cortiza lisa, parda - grisácea, algo avermellada, que co tempo vai gretando. Copa baixa, arredondada, densa e ancha.
Follas de 3,5-8 x 4-7 cm, caedizas, simples, alternas, con pecíolo ben desenvolvido (de ata 3,5 cm), presentando forma variable, pero en conxunto son obovadas e cuneiformes, provistas de 3-7 lóbulos profundos e irregulares, dentadas, cor verde intensa e lustrosas na face, máis pálidas no envés.
Flores hermafroditas, pequenas (8-15 mm) de olor agradable. Cáliz con 5 sépalos, corola con 5 pétalos brancos, estames en número indefinido e ovario ínfero cun só estilo. As flores reúnense en grupos corimbosos de ata 3 cm, con poucas flores cada un, dispostos en longos pedúnculos. O froito é un pomo de 8-10 mm, ovoide, avermellado e coroado polo resto dos sépalos. Semente en número de 1 por pomo. Madura entre setembro e outubro, pero os froitos poden permanecer na árbore ata o inverno.
FLORACIÓN: Florece entre abril e maio. A polinización é entomógama.
ORIXE: Orixinaria de Europa e oeste de Asia.
HÁBITAT: Habita en bosques mixtos caducifolios e sebes.
LOCALIZACIÓN: Pódese atopar por toda Galicia.
USOS: Utilizada como ornamental e como patrón para enxertar outras especies frutais da familia Rosáceas e na formación de sebes. A madeira emprégase na fabricación de mangos para ferramentas e outros útiles pequenos. En medicina as flores teñen utilidade como tónico cardíaco (mellora as arritmias e regula a tensión arterial). Tamén como sedante e antiespasmódico.
Fonte documental: Niño Ricoi, H. (Autor), e Silvar, C. (Ilustrador) (2001) Guía das árbores de Galicia A Coruña: Baía Edicións