Emi de las Heras: In Ictu Oculi, 2015
IN ICTU OCULI, frase en latín que significa “nun abrir e pechar de ollos”, fai referencia ao paso do tempo, á fugacidade da vida. Está na liña da pintura de vanitas, moi característica do século XVII, sobre todo nos bodegóns. A mensaxe que pretende transmitir é a inutilidade dos praceres mundanos fronte á certeza da morte, “Vanidade de vanidades, todo é vanidade”.
A escena dunha pirata que contempla o mar de noite, acompañada por un loro e un peixe, e rodeada doutros símbolos como o cranio, as burbullas, as estrelas, e os destellos da auga, recórdanos a fraxilidade e a brevidade dos momentos, da existencia. A cabeleira, moi esaxerada, tamén é un símbolo do paso do tempo. Este é un elemento protagonista nunha serie realizada pola pintora que leva por título: Cabelo e Ornamento.
Formalmente, é unha composición que xoga coa sinxeleza da cor e da forma, cores planas e formas xeométricas que crean unha composición lixeira sobre o fondo negro. A imaxe ten un tratamento entre a pintura e o debuxo, xa que moitos dos elementos como o peixe ou o corpo da pirata están realizados a base de líneas brancas. Avenida de Bergantiños, IES Alfredo Brañas.