Este caché é recomendable facelo coa marea baixa, doutro xeito non se ven os pasos de poldras que permiten cruzar o río.
Táboa de mareas de Meteogalicia
Os Pasais da Salina son os restos do que antes fora unha ponte que formaba parte do percorrido do Camiño Real que atravesaba o río Maior
na parroquia de Esteiro polo lugar de Reboredo, entre O Maio e Solleiros.
Durante séculos, o denominado Camiño Real era a única comunicación terrestre da zona.
O camiño neste punto só estaba operativo cando o permitía a marea baixa.
Ao contrario do que se podería pensar, a Ponte da Salina fíxose case ao mesmo que a ponte nova da estrada que vai de Noia a Muros.
A contratación tivo lugar polo concello de Muros no ano 1895 e rematouse en 1896, tendo así o Camiño Real un punto onde cruzar o río.
Na seguinte foto podemos ver a ponte antiga, antes de ser desmantelada.
En determinados momentos este camiño tiña servizo de dilixencia, a máis famosa foi a de Belarmino de Solleiros, onde había unha
casa de postas. As casas de postas dispoñíanse nas principais poboacións ao longo das liñas de correos e nas vías principais para
prover o fornezo de cabalos necesario para realizar as viaxes. Moitas servían tamén de parada de dilixencias para viaxeiros.
No ano 1906 xa estaba operativa a nova estrada cunha nova ponte uns centos de metros máis abaixo da Ponte da Salina.
A consecuencia inmediata desta nova construción foi o abandono e espolio de todo o que se podía aproveitar da ponte vella.
Na actualidade só quedan unhas poucas pedras que formaban parte das cepas e que non resultaban doadas transportar polo seu excesivo peso.
No ano 1927 aínda se usaba o paso de poldras, pero xa era moi necesario un novo acceso a Solleiros desde a ponte nova,
tal como se recolle no xornal Correo de Galicia, os veciños cedían os terreos para facer un camiño público.
O entorno foi acondicionado no 2011 e tamén se empedrou un tramo do que fora a antiga vía de comunicación.
Fontes:
Elixio Vieites a través de Patrimonio Galego
Gracias a CristinaPaz por regalarme o seu caché.