Xunto a Taboadela atópase un pequeno montículo de 453 m de altura coñecido popularmente como Alto de San Xoan aínda que oficialmente é o Monte do Castro. Este nome indica a presenza de restos, hoxe non visibles, dun posible asentamento castrexo. Anterior a este asentamento, podemos ver uns pequenos petróglifos nunha pedra.
O Monte do Castro de Taboadela é agora unha área recreativa cun gran monumento dedicado á familia, erixido en 1994 por un escultor veciño do concello de Taboadela, Xosé Cid. Dende o cumio, hai moi boas vistas do val da Rabeda. Preto do outeiro está a sinxela capela de San Xoán.
O monumento á familia é unha escultura de 4 metros de alto e casi 50 toneladas de peso que representa a unha parella de labregos coas suas ferramentas de traballo e un neno no colo. Foi creada fai trinta anos para homenaxear as familias.
Traxectoria do artista
Nado en Santa Cruz da Rabeda, comeza a súa andaina de maneira autodidacta a finais dos anos sesenta sen adscribirse a escola ou grupo algún. Traballa co barro, madeira, pedra, mármore e bronce como elementos principais que dan a entender unha escultura que trata de superar a plástica figurativa cara a unhas formas sintéticas.
Ten feito unha importante cantidade de obra pública, das que poden destacarse o monumento a Breogán nos arredores da Torre de Hércules en A Coruña; o monumento a Concepción Arenal en Ferrol; a San Rosendo en Ourense e moitos outros monumentos e bustos espallados por Galicia de destacados escritores, coma Eduardo Blanco Amor, Carlos Casares ou Otero Pedrayo. Ten obra en importantes coleccións privadas e públicas.
A evolución da súa obra ata hoxe o conforma coma unha das figuras máis salientables da escultura galega dos últimos cincuenta anos.
Nunha entrevista que lle fixo o periódico local "La Región" dixo que cando era moi pequeno e empezou a tallar e a buscarse a vida como aprendiz, o que máis lle gustaba era facer figuras, cabezas de guerreiros.
